جنوبی افریقا نے زمبابوے کو شکست دے کر سہ ملکی ٹی ٹوئنٹی سیریز جیت لی

جنوبی افریقا نے نمیبیا ٹی ٹوئنٹی سہ ملکی سیریز کے فائنل میں زمبابوے کو 48 رنز سے شکست دے کر سیزن کی پہلی ٹرافی اپنے نام کرلی۔یہ گزشتہ آٹھ روز میں زمبابوے کے خلاف جنوبی افریقا کی تیسری کامیابی تھی۔تجرباتی اسکواڈ کے باوجود جنوبی افریقا نے ایک بار پھر 200 سے زائد رنز کا مجموعہ ترتیب دیا۔انجری کے باعث لوہان ڈرے پریٹوریئس کی عدم موجودگی میں کونر ایسٹرہیزن اور جارڈن ہرمن نے 84 رنز کی اوپننگ شراکت قائم کی جبکہ روبن ہرمن اور ڈیوالڈ بریوس نے پانچویں وکٹ پر 47 رنز جوڑے۔ہدف کے تعاقب میں زمبابوے کی بیٹنگ ابتدا ہی میں بکھر گئی اور صرف 57 رنز پر 6 وکٹیں گر گئیں۔بریڈ ایونز نے 56 رنز کی ناقابل شکست اننگز کھیل کر مزاحمت کی مگر وہ ٹیم کو کامیابی نہ دلا سکے۔واضح رہے کہ سہ ملکی سیریز میں جنوبی افریقا اور زمبابوے کے ساتھ نمیبیا کی ٹیم شامل تھی۔