روسی صدر ولادیمیر پیوٹن نے چین کے دو روزہ دورے سے قبل شائع ہونے والے چینی سرکاری میڈیا کے ساتھ ایک انٹرویو میں یوکرین کے بحران کو حل کرنے میں مدد کے لیے بیجنگ کی دلچسپی کو سراہا ہے۔خبر رساں ایجنسی ’اے ایف پی‘ کے مطابق روسی صدر جمعرات کو اپنے ’عزیز دوست‘ شی جن پنگ سے ملنے بیجنگ پہنچیں گے، جو یوکرین جنگ اور تنہائی کا شکار معیشت کے لیے چین سے تعاون حاصل کرنے کی کوشش کر رہے ہیں۔ولادیمیر پیوٹن کا یہ دورہ مارچ کے مہینے میں روس میں ہونے والے انتخابات میں ان کے دوبارہ صدر منتخب ہونے کے بعد پہلا بیرون ملک دورہ ہے اور صرف چھ ماہ سے بھی کم عرصے کے دوران ان کا چین کا دوسرا دورہ ہے، جس کے دوران وہ تجارتی اور سرمایہ کاری نمائش کے لیے شمال مشرقی شہر ہاربن کا بھی سفر کریں گے۔چین کی سرکاری خبر رساں ایجنسی ’شنہوا‘ کو ماسکو میں دیے گئے انٹرویو کے دوران روسی صدر کا کہنا تھا کہ ’ہم یوکرین کے بحران کو حل کرنے کے لیے چین کے نقطہ نظر کی تعریف کرتے ہیں‘۔روسی صدر نے بحران پر سیاسی مفاہمت کے حوالے سے چین کے فروری 2023 میں شائع ہونے والے 12 نکاتی پیپر کا حوالہ دیتے ہوئے کہا کہ ’بیجنگ اس کی بنیادی وجوہات اور عالمی جغرافیائی سیاسی اہمیت سے بخوبی واقف ہے‘۔
