بھارت کے یومِ آزادی پر مقبوضہ کشمیر میں یومِ سیاہ منایا گیا

بھارت کے یومِ آزادی پر مقبوضہ کشمیر میں یومِ سیاہ منایا گیا۔کل جماعتی حریت کانفرنس کی اپیل پر کنٹرول لائن کے دونوں جانب اور دنیا بھر میں کشمیریوں نے بھارتی قبضے کے خلاف احتجاج کیا، یومِ سیاہ کی کال کی آزادی پسند رہنماؤں اور مختلف تنظیموں نے بھی حمایت کا اعلان کیا ۔دنیا بھر میں مقیم کشمیریوں نے بھارت مخالف مظاہرے کرکے مقبوضہ کشمیر میں جاری بھارتی اقدامات اور مبینہ انسانی حقوق کی خلاف ورزیوں کی جانب عالمی برادری کی توجہ مبذول کروائی ۔دوسری جانب بھارتی انتظامیہ نے مقبوضہ کشمیر، بالخصوص سری نگر میں سکیورٹی مزید سخت کردی ہے۔ بخشی اسٹیڈیم کے اطراف کئی سطحوں پر سکیورٹی حصار قائم کیے گئے ہیں جبکہ گاڑیوں، مسافروں اور راہگیروں کی سخت چیکنگ کی گئی ۔بخشی اسٹیڈیم میں بھارتی یومِ آزادی کی مرکزی تقریب منعقد کی گئی۔