امریکی ریاست نیو جرسی میں میراتھون کے شرکا کیلئے سیلاب زدہ راستے سےگزرنا چیلنج بن گیا
امریکی ریاست نیو جرسی کے شہر پیرامس میں ہاف میراتھون کے شرکا کے لیے سیلاب زدہ راستے سےگزرنا چیلنج بن گیا اور میراتھون تقریباً تیراکی کا مقابلہ بن گئی۔رنرز کے لیے ہاف میراتھون کی دوڑ اس وقت خطرناک صورت حال میں تبدیل ہوگئی جب شدید بارش کے باعث راستےکے کچھ حصے زیر آب آگئے اور رنرزکو کئی فٹ گہرے پانی میں سے گزرنا پڑا۔کسی کے زخمی ہونے یا کسی بھی حادثےکی اطلاع نہیں ملی تاہم میراتھون منعقد کرنے والی تنظیم کو وارننگ کے باوجود ایونٹ جاری رکھنے پر شدید تنقیدکا سامنا کرنا پڑا۔ حکام کی جانب سے سیلاب کی وارننگ پہلے ہی جاری کردی گئی تھی۔ایک رنر نے امریکی میڈیا کو بتایا کہ انہوں نے میراتھون کے دوران گہرے پانی میں سینے تک پھنسی ہوئی ایک 71 سالہ خاتون کو دیکھا اور انہیں بحفاظت باہر نکالنےکے لیے ایک اور شخص کے ساتھ اٹھا کر لے جانا پڑا۔ اس کے علاوہ بھی متعدد جگہوں پر رنر کمر تک گہرے پانی میں سےگزرتے ہوئے نظر آئے۔رپورٹ کے مطابق میراتھون کے تقریباً اختتام کے قریب پولیس نے مداخلت کی اور رنرز کو راستہ تبدیل کرنے پر مجبور کیا۔
