امریکہ نے جنوبی کوریا کو 125 ملین ڈالر مالیت کے جدید فضائی میزائل اور متعلقہ فوجی سازوسامان فروخت کرنے کی ممکنہ منظوری دے دی ہے۔محکمہ خارجہ نے اس فروخت کی منظوری دی، جس کا مقصد جنوبی کوریا کی فضائی دفاعی صلاحیت اور علاقائی خطرات کے خلاف دفاعی تیاری مضبوط کرنا ہے۔جنوبی کوریا نے اے آئی ایم 9 ایکس سائیڈ ونڈر بلاک 103 فضائی میزائل اور 10 ٹیکٹیکل گائیڈنس یونٹس خریدنے کی درخواست کی تھی۔ یہ میزائل جنگی طیاروں کے ذریعے دشمن کے فضائی اہداف کو نشانہ بنانے کے لیے استعمال ہوتے ہیں۔اے آئی ایم 9 ایکس ایک جدید قلیل فاصلے کا ہوا سے ہوا میں مار کرنے والا میزائل ہے، جس میں بہتر رہنمائی، تیز رفتار ردعمل اور انتہائی پھرتی سے فضائی اہداف کو نشانہ بنانے کی صلاحیت موجود ہے۔تاہم واضح رہے کہ اس معاملے میں امریکی کانگریس کو باضابطہ اطلاع اور جائزے کا مرحلہ ابھی شامل ہے۔ مجوزہ پیکج کی مجموعی مالیت تقریباً 125 ملین ڈالر ہے۔یہ پیش رفت ایسے وقت میں ہوئی ہے جب امریکہ اور جنوبی کوریا کے درمیان مشترکہ فوجی مشقوں اور واشنگٹن کی خطے میں دفاعی حکمت عملی پر بھی بحث جاری ہے۔
