باکو میں وزیراعلیٰ مریم نواز شریف کا تاریخی خطاب، پنجاب کے ترقیاتی ماڈل کو عالمی سطح پر پذیرائی

لاہور(آصف اقبال) وزیراعلیٰ پنجاب مریم نواز شریف نے آذربائیجان کے دارالحکومت باکو میں منعقدہ عالمی شہری فورم کے قائدین اجلاس سے خطاب کرتے ہوئے پنجاب میں جاری ترقیاتی منصوبوں، عوامی فلاحی اقدامات اور جدید شہری اصلاحات کو دنیا کے سامنے پیش کیا۔وزیراعلیٰ مریم نواز شریف نے کہا کہ عالمی شہری فورم میں شرکت ان کے لیے باعثِ اعزاز ہے جبکہ باکو جدید شہری ترقی، دوراندیشی اور عالمی روابط کی روشن مثال ہے۔ انہوں نے کہا کہ باکو کا تاریخی قدیم شہر پاکستان اور آذربائیجان کے دیرینہ تہذیبی تعلقات کی عکاسی کرتا ہے جبکہ ملتان سرائے جیسے قدیم تجارتی راستے دونوں ممالک کے عوامی روابط کے گواہ ہیں۔انہوں نے کہا کہ وہ قائد میاں محمد نواز شریف وزیراعظم میاں محمد شہباز شریف اور پاکستانی عوام کی جانب سے محبت، احترام اور خیر سگالی کا پیغام لے کر آئی ہیں۔ وزیراعلیٰ نے حکومتِ آذربائیجان کی جانب سے پرتپاک استقبال اور بہترین انتظامات پر شکریہ ادا کیا۔اپنے خطاب میں وزیراعلیٰ پنجاب نے آذربائیجان کے صدر Ilham Aliyev کے وژن کو سراہتے ہوئے کہا کہ پائیدار ترقی اور مضبوط شہری نظام کے لیے ان کی قیادت قابلِ تحسین ہے۔ انہوں نے کہا کہ ان کے والد نواز شریف اور آذربائیجان کے بانی رہنما Heydar Aliyev کے درمیان اعتماد، احترام اور بھائی چارے پر مبنی تعلقات قائم تھے، جو آج بھی دونوں ممالک کی دوستی کی بنیاد ہیں۔مریم نواز شریف نے کہا کہ پنجاب میں شہری ترقی کو انسان دوست، ماحول دوست اور جدید ڈیٹا نظام سے ہم آہنگ بنایا جا رہا ہے۔ انہوں نے بتایا کہ پنجاب سوشل اکنامک رجسٹری کے تحت پہلی بار گھر گھر جا کر اعداد و شمار جمع کیے جا رہے ہیں تاکہ ترقی کے سفر میں کسی کو پیچھے نہ چھوڑا جائے۔وزیراعلیٰ نے کہا کہ “اپنی چھت اپنا گھر” منصوبے کے تحت پنجاب میں بلا سود قرضوں کی بنیاد پر دنیا کا بڑا رہائشی منصوبہ جاری ہے۔ انہوں نے بتایا کہ ایک سال سے کم عرصے میں ایک لاکھ ساٹھ ہزار خاندانوں کو رہائشی سہولت فراہم کی جا چکی ہے جبکہ ایک لاکھ سے زائد خاندان اپنے گھروں میں منتقل ہو چکے ہیں۔ ان کا کہنا تھا کہ یہ منصوبہ صرف گھر تعمیر کرنے کا نہیں بلکہ عوام کے وقار کی بحالی کا عملی اقدام ہے۔انہوں نے “ماڈل ویلیج پروگرام” کا ذکر کرتے ہوئے کہا کہ پنجاب کے دو ہزار سے زائد دیہاتوں میں صاف پانی، نکاسی آب، پختہ گلیوں اور شمسی توانائی کے منصوبوں کے ذریعے ترقیاتی کام جاری ہیں۔ وزیراعلیٰ نے کہا کہ صاف پانی کی فراہمی حکومت کی بنیادی ترجیح ہے تاکہ کسی عورت کو پانی کے لیے میلوں سفر نہ کرنا پڑے اور کوئی بچہ آلودہ پانی سے بیمار نہ ہو۔مریم نواز شریف نے بتایا کہ پنجاب میں دو ارب ڈالر سے زائد مالیت کے تاریخی شہری ترقیاتی پروگرام کے تحت سڑکوں، نکاسی آب، واٹر اسٹوریج اور شہری تحفظ کے منصوبے مکمل کیے جا رہے ہیں۔ انہوں نے کہا کہ گزشتہ دو برسوں میں تیس ہزار کلومیٹر سے زائد سڑکیں تعمیر کی جا چکی ہیں جن سے عوامی آمدورفت اور معاشی سرگرمیوں میں نمایاں بہتری آئی ہے۔وزیراعلیٰ نے “میگنیفیشنٹ پنجاب” پروگرام کے تحت تاریخی مقامات، عجائب گھروں، آثارِ قدیمہ اور مذہبی ورثے کی بحالی کے اقدامات کا ذکر کرتے ہوئے کہا کہ لاہور کو دو ہزار چھبیس تا دو ہزار ستائیس کے لیے “ای سی او سیاحتی دارالحکومت” قرار دیا جانا پاکستان کے لیے اعزاز ہے۔ انہوں نے کہا کہ شنگھائی تعاون تنظیم نے بھی لاہور کو اہم ثقافتی اور سیاحتی مرکز کے طور پر تسلیم کیا ہے۔صفائی اور ماحولیات کے حوالے سے وزیراعلیٰ نے کہا کہ “ستھرا پنجاب” منصوبے کے تحت ایک لاکھ پچاس ہزار سے زائد صفائی کارکن روزانہ خدمات انجام دے رہے ہیں۔ انہوں نے کہا کہ اب فضلے کو ری سائیکلنگ، کھاد اور توانائی میں تبدیل کرنے کے جدید نظام پر کام کیا جا رہا ہے تاکہ شہروں کو پائیدار اور وسائل کے لحاظ سے مضبوط بنایا جا سکے۔اسموگ کے خاتمے اور ماحولیاتی بہتری کے لیے وزیراعلیٰ نے کہا کہ پنجاب میں جدید نگرانی نظام کے ذریعے فضائی آلودگی پر قابو پانے کی کوششیں جاری ہیں۔ انہوں نے بتایا کہ صوبے میں گیارہ سو برقی بسیں متعارف کرائی جا چکی ہیں جبکہ دو ہزار انتیس تک پانچ ہزار برقی بسیں، موٹر سائیکلیں اور ٹیکسیاں فراہم کرنے کا ہدف مقرر کیا گیا ہے۔ “پلانٹ فار پنجاب” مہم کے تحت صوبے بھر میں پانچ کروڑ درخت لگائے جا چکے ہیں۔وزیراعلیٰ پنجاب نے کہا کہ “سیف سٹی” منصوبے کے تحت جدید کیمروں اور ٹیکنالوجی کے ذریعے عوام، خصوصاً خواتین اور بچوں کو محفوظ ماحول فراہم کیا جا رہا ہے۔ انہوں نے کہا کہ حکومتوں کی کامیابی تقریروں سے نہیں بلکہ عوام کی زندگیوں میں آنے والی مثبت تبدیلیوں سے دیکھی جاتی ہے۔اپنے خطاب کے اختتام پر وزیراعلیٰ مریم نواز شریف نے کہا کہ مضبوط، محفوظ اور ترقی یافتہ شہر کسی ایک طبقے کا حق نہیں بلکہ پوری انسانیت کا بنیادی حق ہیں۔ انہوں نے “پاکستان زندہ باد، آذربائیجان زندہ باد” کے نعروں کے ساتھ اپنے خطاب کا اختتام کیا۔دوسری جانب عالمی شہری فورم میں قائم پنجاب پویلین دنیا بھر سے آئے مندوبین کی خصوصی توجہ کا مرکز بن گیا جہاں پنجاب کے ترقیاتی منصوبوں، سرمایہ کاری کے مواقع اور جدید حکومتی اقدامات کو بھرپور انداز میں پیش کیا گیا۔