واشنگٹن: امریکی صدر ڈونلڈ ٹرمپ نے فیفا ورلڈ کپ 2026ء کی تیاریوں کیلئے وائٹ ہاؤس میں ٹاسک فورس قائم کرنے کا اعلان کرتے ہوئے ایگزیکٹو آرڈر پر دستخط کر دیئے۔امریکی صدر نے کہا کہ یہ سب سے بڑا ایونٹ ہے، اس ایونٹ میں شرکت کا ارادہ رکھتا ہوں، ایونٹ سے 40 ارب ڈالر سے زائد کا معاشی اثر پڑے گا، امریکا پہلی بار کلب ورلڈ کپ 2025ء کیلئے بھی تیار ہے، ڈونلڈ ٹرمپ اور فیفا کے صدر نے کلب ورلڈ کپ کی ٹرافی کی ڈیزائن کی رونمائی کی۔یہ ٹورنامنٹ امریکا، کینیڈا اور میکسیکو میں مشترکہ طور پر منعقد ہوگا جس میں 48 ٹیمیں حصہ لیں گی اور 104 میچز کھیلے جائیں گے، فائنل میچ 19 جولائی 2026 کو نیوجرسی کے میٹ لائف سٹیڈیم میں ہوگا۔امریکی صدر ڈونلڈ ٹرمپ اس ٹاسک فورس کی سربراہی خود کریں گے جبکہ نائب صدر جے ڈی وینس نائب سربراہ ہوں گے، یہ ٹیم وفاقی حکومت کی مختلف ایجنسیوں کے تعاون سے ٹورنامنٹ کی سکیورٹی اور منصوبہ بندی کی نگرانی کرے گی۔میڈیا رپورٹس میں بتایا گیا ہے کہ فیفا ورلڈ کپ کے دوران 100 ملین سے زائد سیاحوں کی آمد متوقع ہے اور اس کے فائنل میں تقریبا 2 بلین سے زائد سیاحوں کی آمد کی توقع کی جا رہی ہے جبکہ اس ایونٹ کے دوران دو لاکھ نوکریاں بھی پیدا ہوں گی۔فیفا کے صدر جیانی انفینٹینو نے اس اقدام کا خیرمقدم کرتے ہوئے کہا ہے کہ یہ ٹاسک فورس ٹورنامنٹ کی کامیابی اور سکیورٹی کو یقینی بنانے میں اہم کردار ادا کرے گی، انہوں نے مزید کہا کہ یہ ایک بڑا لاجسٹک چیلنج ہے جس کا موازنہ روزانہ کئی سپر باؤلز کے انعقاد سے کیا جا سکتا ہے۔واضح رہے کہ امریکا 2028ء میں کیلیفورنیا میں ہونے والے سمر اولمپکس کی میزبانی بھی کرے گا جو کھیلوں کے کیلنڈر میں ایک اور اہم ایونٹ ہے۔
