واشنگٹن: امریکا نے یمن کے حوثیوں کو غیر ملکی دہشت گرد قرار دے دیا۔امریکا کے سیکرٹری اسٹیٹ مارکو روبیو نے بیان میں کہا کہ اسٹیٹ ڈیپارٹمنٹ نے صدر ڈونلڈ ٹرمپ کی جانب سے کئے گئے وعدوں میں سے ایک آج پورا کیا جا رہا ہے اور انصاراللہ کو بطور غیرملکی دہشت گرد تنظیم قرار دے دیا گیا ہے جو عام طور پر حوثی کے نام سے مشہور ہے۔میڈیا رپورٹ کے مطابق وائٹ ہاؤس سے جاری صدارتی حکم نامے میں کہا گیا ہے کہ حوثیوں کی سرگرمیاں مشرق وسطیٰ میں امریکی شہریوں اور اہلکاروں کے لئے خطرات کا باعث ہیں، اسی طرح خطے میں ہمارے قریب ترین شراکت داروں اور بین الاقوامی بحری تجارت کے استحکام کے لیے بھی خطرہ ہیں۔سیکرٹری اسٹیٹ نے بیان میں کہا کہ حوثیوں نے 2023ء سے خلیج عدن اور بحیرہ احمر میں کئی تجارتی جہازوں پر حملے کئے ہیں اور اسی طرح امریکی اہلکاروں کے ساتھ ساتھ خطے میں شراکت داروں کو بھی نشانہ بنایا ہوا ہے۔یہ اقدامات ٹرمپ انتظامیہ کے ان وعدوں کی روشنی میں کیے گئے جو اس نے قومی مفادات کے تحفظ، امریکی شہریوں کی سلامتی اور امریکا کی سلامتی کو یقینی بنانے کے لیے کر رکھے ہیں۔امریکی سیکرٹری اسٹیٹ نے کہا کہ حوثیوں کو دہشت گرد قرار دینا دہشت گردی کے خلاف جنگ کا اہم جزو ہے اور اس سے دہشت گردی کی سرگرمیوں کو محدود کرنے میں مدد ملے گی۔
