لاہور اور کراچی ایئرپورٹس کی توسیع کی منظوری، مسافروں کو عالمی معیار کی سہولیات فراہم کرنے کی وزیراعظم کی ہدایت

اسلام آباد ( آصف اقبال ) وزیراعظم محمد شہباز شریف نے لاہور اور کراچی کے بین الاقوامی ہوائی اڈوں کی ماسٹر پلانز کے تحت توسیع کی منظوری دیتے ہوئے منصوبوں کو مقررہ مدت میں مکمل کرنے اور تعمیراتی معیار پر کسی قسم کا سمجھوتہ نہ کرنے کی ہدایت کی ہے۔وزیراعظم کی زیر صدارت اسلام آباد میں منعقدہ اجلاس میں ملک کے بڑے ہوائی اڈوں کی توسیع، اپ گریڈیشن اور مسافروں کو بہتر سفری سہولیات کی فراہمی کا جائزہ لیا گیا۔ اجلاس میں ہدایت کی گئی کہ پاکستانی ایئرپورٹس پر مسافروں کی سہولت کو اولین ترجیح دی جائے اور بین الاقوامی معیار کے مطابق خدمات کو بہتر بنایا جائے۔وزیراعظم نے توسیعی منصوبوں اور مسافروں کی سہولیات سے متعلق اصلاحات کی تھرڈ پارٹی ویلیڈیشن یقینی بنانے، بین الاقوامی شہرت یافتہ اداروں کی خدمات حاصل کرنے اور ایئرپورٹس پر تعینات افسران و عملے کو اعلیٰ معیار کی سروس ڈلیوری کی باقاعدہ تربیت فراہم کرنے کی ہدایت کی۔ انہوں نے مختلف اداروں کے درمیان رابطوں کو بہتر بنانے اور مسافروں کے لیے معیاری کھانے پینے کی سہولیات یقینی بنانے پر بھی زور دیا۔اجلاس کو بتایا گیا کہ جناح انٹرنیشنل ایئرپورٹ کراچی کے رن وے کی توسیع مکمل ہو چکی ہے، جبکہ کراچی اور لاہور ایئرپورٹس کے ماسٹر پلانز کے تحت مزید توسیع کی منصوبہ بندی اور تعمیراتی مراحل پر کام جاری ہے۔ سول ایوی ایشن اتھارٹی نے گزشتہ ایک سال کے دوران مقامی پروازوں کی بحالی کے لیے 14 ایئرپورٹس فعال کیے ہیں بریفنگ میں مزید بتایا گیا کہ بڑے ایئرپورٹس پر خودکار بارڈر مینجمنٹ نظام (ای گیٹس) کی تنصیب پر کام جاری ہے، جبکہ کراچی کو ایئر کارگو حب بنانے کے لیے ایئر کارگو ولیج بھی تعمیر کیا جا رہا ہے۔ اسلام آباد ایئرپورٹ پر مسافروں کی سہولت کے لیے میٹ اینڈ گریٹ سروس شروع کر دی گئی ہے، جبکہ ایف آئی اے نے بڑے ایئرپورٹس پر مسافروں کی رہنمائی کے لیے پری ڈیپارچر ڈیسک قائم کیے ہیں اور عملے و کاؤنٹرز کی تعداد میں اضافہ کیا ہے۔اجلاس کو یہ بھی بتایا گیا کہ حیدرآباد میں موجود ہوا بازی کے ادارے کو ترقی دے کر بین الاقوامی معیار کی ایوی ایشن یونیورسٹی بنایا جا رہا ہے، جس پر فروری 2028 تک کام شروع کرنے کا منصوبہ ہے۔اجلاس میں نائب وزیراعظم و وزیر خارجہ سینیٹر محمد اسحاق ڈار، وفاقی وزراء خواجہ محمد آصف، ڈاکٹر مصدق ملک، احد خان چیمہ، عطاء اللہ تارڑ، وزیراعظم کے مشیر محمد علی، ارکان قومی اسمبلی راجہ اسامہ سرور اور علی زاہد، وزیراعظم کے کوآرڈینیٹر سردار یاسر الیاس اور متعلقہ اعلیٰ حکام نے شرکت کی۔