یورپی پارلیمنٹ کے باہر پاکستانی و کشمیری کمیونٹی کا بھارتی جارحیت کیخلاف مظاہرہ

برسلز : یورپی پارلیمنٹ کے سامنے پاکستانی اور کشمیری کمیونٹی کی جانب سے ایک پُرامن احتجاجی مظاہرہ کیا گیا، جس میں افواجِ پاکستان سے یکجہتی اور بھارت کی حالیہ جارحیت کے خلاف بھرپور آواز بلند کی گئی۔مظاہرے میں مراکش، الجزائر، ترکی، تیونس سمیت کئی اسلامی ممالک کے نوجوانوں نے بھی شرکت کی اورپاکستان زندہ باد اورافواجِ پاکستان پائندہ باد کے نعرے لگائے۔تقریب سے خطاب کرتے ہوئے چیئرمین ای یو پاک فرینڈشپ فیڈریشن یورپ نے کہا: پاکستان ہمیشہ امن کا حامی رہا ہے، لیکن ہماری خاموشی کو کمزوری نہ سمجھا جائے۔انہوں نے آرمی چیف جنرل سید عاصم منیر کی قیادت میں حالیہ کامیاب آپریشنز پر خراج تحسین پیش کیا اور کہا کہ25 کروڑ پاکستانی افواج کے ساتھ ہیں اور ہر قربانی کے لیے تیار ہیں۔مقررین نے عالمی برادری اور یورپی یونین سے مطالبہ کیا کہ وہ بھارت کی انسانی حقوق کی خلاف ورزیوں کا نوٹس لیں اور جنوبی ایشیا میں امن کے لیے اپنا کردار ادا کریں۔مظاہرہ ملک کی سلامتی، ترقی اور خوشحالی کے لیے دعا کے ساتھ اختتام پذیر ہوا۔