امریکی خلائی ڈیٹا کمپنی آسٹرونومر کے سی ای او اینڈی بائرن اور ہیومن ریسورسز کی ہیڈ کرسٹن کیبوٹ کے درمیان مبینہ معاشقے کی ویڈیو منظر عام پر آنے کے بعد انٹرنیٹ پر ہلچل مچ گئی ہے، اور اس بار بھی مشہور اینی میٹڈ سیریز ’دی سمپسنز‘ کی پیش گوئیوں کی بحث دوبارہ گرم ہوگئی ہے۔یہ معاملہ اُس وقت منظر عام پر آیا جب 16 جولائی 2025 کو بوسٹن میں ہونے والے کولڈ پلے کے کنسرٹ میں اینڈی اور کرسٹن کو کیمرے پر ایک دوسرے کے ساتھ بغلگیر ہوتے اور قربت کے لمحات بانٹتے ہوئے دیکھا گیا۔ اس واقعے کی ویڈیو جیسے ہی وائرل ہوئی، سوشل میڈیا پر میمز کی بھرمار ہوگئی، اور کنسرٹ کے مزید کلپس بھی گردش کرنے لگے، جس نے صارفین کی توجہ اپنی طرف کھینچ لی۔اس معاملے کے منظر عام پر آنے کے ساتھ ہی انٹرنیٹ پر عجیب و غریب نظریات اور دعوے سامنے آنا شروع ہوگئے۔ کچھ صارفین کا دعویٰ ہے کہ ’دی سمپسنز‘ نے برسوں قبل ہی اینڈی بائرن اور کرسٹن کیبوٹ کے اسکینڈل کی پیش گوئی کر دی تھی۔ یہ افواہیں اس وقت مزید پھیلیں جب سوشل میڈیا پر سمپسنز کے دو کرداروں کی ایک تصویر وائرل ہوئی جو اینڈی اور کرسٹن کی ’کِس کیم‘ والی تصویر سے حیران کن حد تک مشابہت رکھتی تھی۔ اس تصویر میں دونوں کرداروں کے لباس اور تاثرات بھی وہی دکھائے گئے جس سے صارفین حیران رہ گئے۔
