وفاقی وزارت داخلہ کے زیرِ انتظام پاکستان کا سب سے بڑا خدمت مرکز کراچی میں قائم ہوگا

کراچی ( آصف اقبال ) وفاقی وزیر داخلہ محسن نقوی نے آئی آئی چندریگر روڈ پر وزارت داخلہ کے دفتر کا دورہ کیا، جہاں انہوں نے کراچی میں وفاقی وزارت داخلہ کے زیرِ انتظام ملک کے سب سے بڑے گرینڈ خدمت مرکز کے قیام کے حوالے سے اہم ہدایات جاری کیں۔محسن نقوی نے کہا کہ گرینڈ خدمت مرکز میں وزارت داخلہ کے تمام متعلقہ اداروں کے کاؤنٹرز قائم کیے جائیں گے، جہاں شہریوں کو ایک ہی چھت تلے پاسپورٹ، شناختی کارڈ، اسلحہ لائسنس، مختلف این او سیز اور دیگر ضروری سہولیات فراہم کی جائیں گی۔وفاقی وزیر داخلہ نے متعلقہ حکام کو ہدایت کی کہ خدمت مرکز کا ماسٹر پلان 10 روز کے اندر تیار کرکے پیش کیا جائے۔ انہوں نے کہا کہ ماسٹر پلان کی تیاری میں شہریوں کی سہولت سمیت تمام ضروری تقاضوں کو مدنظر رکھا جائے۔محسن نقوی نے کہا کہ خدمت مرکز کا بنیادی مقصد شہریوں کو مختلف سرکاری خدمات کے حصول کے لیے الگ الگ دفاتر کے چکر سے نجات دلانا اور تمام متعلقہ سہولیات ایک ہی چھت تلے فراہم کرنا ہے۔وفاقی وزیر داخلہ نے گرینڈ خدمت مرکز کے قیام کے لیے تمام ضروری اقدامات یقینی بنانے کی بھی ہدایت کی۔