آسٹریلوی کرکٹر عثمان خواجہ ایک بار پھر فلسطینیوں پر اسرائیلی مظالم کیخلاف بول پڑے

آسٹریلوی ٹیسٹ کرکٹر عثمان خواجہ ایک بار پھر نہتے فلسطینیوں اور بچوں پر اسرائیلی مظالم کے خلاف بول پڑے۔عثمان خواجہ تواتر کے ساتھ بچوں پر ہونے والے ظلم پر آواز بلند کرتے رہتے ہیں۔حال ہی میں عثمان خواجہ نے اپنے انسٹاگرام پر اسرائیلی حملوں کی وجہ سے زخمی ہونے والے فلسطینی بچوں کی ویڈیو اپ لوڈ کی ہے۔کرکٹر نے ویڈیو کے ساتھ لکھا کہ یہ دیکھنا مشکل ہے، ایسے جینے کا تصور کریں، اس بربریت اور ظلم کو ہم اب بھی دیکھ رہے ہیں، یونیسیف نے اسے بچوں کے لیے قبرستان قرار دیا ہے۔عثمان خواجہ نے مزید لکھا کہ 2 سال ہوگئے اور اب بھی بچے مارے جا رہے ہیں، انسانوں کو بھوکا مارا جارہا ہے، ابتدائی طبی امداد کے مراکز پر حملے کیے جا رہے ہیں۔آسٹریلوی کرکٹر نے کہا کہ میں اس حوالے سے بولتا رہوں گا، اگر ہمارے لیے یہ سب معمول بن گیا ہے تو حقیقت میں ہم ختم ہو چکے ہیں، آواز اٹھانا مت بند کریں، ہمیشہ انسانیت، برابری اور ایک بہتر کل کے لیے کھڑے ہوں۔ واضح رہے کہ غزہ میں اکتوبر 2023 سے جاری اسرائیلی حملوں میں اب تک 58 ہزار فلسطینی شہید ہوچکے ہیں اورتقریباً ایک لاکھ 40 ہزار سے زائد زخمی ہیں۔