کنگنا رناوت کا نصیرالدین شاہ پر طنزیہ وار، اداکار کو ’لومڑی‘ کہہ ڈالا
کنگنا رناوت نے سینئر بھارتی اداکار نصیرالدین شاہ اور پیوش مشرا کے درمیان جاری لفظی جنگ میں اداکار کی مخالفت کر کے انہیں سخت تنقید کا نشانہ بنایا۔تنازع اس وقت شروع ہوا جب نصیرالدین شاہ نے طلبہ کے احتجاج پر بالی ووڈ کی خاموشی پر تنقید کرتے ہوئے فلم انڈسٹری کا موازنہ ایسے ’کتے‘ سے کیا جو منہ میں ہڈی ہونے کے باعث بھونک نہیں سکتا۔بعد ازاں جھارکھنڈ میں طلبہ کے احتجاج کے دوران پیوش مشرا نے نصیرالدین شاہ کے بیان پر سوال اٹھاتے ہوئے کہا کہ اگر وہ بالی ووڈ کی خاموشی پر سوال کر رہے ہیں تو انہیں خود بھی بتانا چاہیے کہ وہ احتجاج میں کہاں موجود ہیں۔پیوش مشرا کے بیان پر ردعمل دیتے ہوئے کنگنا رناوت نے نصیرالدین شاہ کو نشانہ بناتے ہوئے کہا کہ وہ ایسے شخص کو کتے کے بجائے لومڑی کہنا پسند کریں گی کیونکہ وفاداری کے اعتبار سے کتے سے تشبیہ ملنا بھی قابلِ فخر بات ہو سکتی ہے۔کنگنا نے مزید دعویٰ کیا کہ نصیرالدین شاہ اس ملک میں رہتے اور کماتے ہیں لیکن ان کی ہمدردیاں پڑوسی ملک کے لیے ہیں۔
