اسپیس ایکس کے راکٹ لانچ کے بعد آسمان پر بننے والا دلکش نظارہ

امریکا کی خلائی تحقیقاتی کمپنی اسپیس ایکس کے کارگو مشن CRS-35 کی 13 اکتوبر کی صبح روانگی کے دوران آسمان پر ایک دلکش منظر دیکھنے میں آیا، جب راکٹ سے خارج ہونے والے دھوئیں کے بادل سورج کی روشنی میں چمک اٹھے اور ان کی شکل ایک دیوہیکل جیلی فش جیسی دکھائی دینے لگی۔اسپیس ایکس کے اس مشن کی لانچنگ کے دوران راکٹ کے اخراج سے بننے والے بادلوں پر جب سورج کی روشنی پڑی تو وہ روشن ہوگئے، جس کے نتیجے میں آسمان پر ایک منفرد اور غیر معمولی منظر تشکیل پایا۔ماہرین کے مطابق اس طرح کا نظارہ اس وقت بھی دیکھنے میں آ سکتا ہے جب کوئی راکٹ غروبِ آفتاب کے قریب لانچ کیا جائے۔ اس دوران زمین پر اندھیرا چھانے لگتا ہے لیکن بلندی پر موجود راکٹ کے اخراج کے بادلوں پر سورج کی روشنی پڑتی رہتی ہے، جس سے وہ چمکتے ہوئے دکھائی دیتے ہیں۔یہ قدرتی روشنی اور راکٹ کے اخراج کا امتزاج آسمان پر جیلی فش جیسی حیرت انگیز شکل پیدا کرتا ہے، جو دیکھنے والوں کے لیے ایک منفرد بصری تجربہ بن جاتا ہے۔