ایپل کا نیا ہوم پوڈ منی 2 متعارف، سری اے آئی اور جدید فیچرز شامل

امریکی ٹیکنالوجی کمپنی ایپل نے اپنے اسمارٹ اسپیکر ہوم پوڈ منی کا نیا ورژن متعارف کرا دیا ہے، جس کا مقصد ڈیجیٹل اسسٹنٹ سری کو صارفین کی روزمرہ زندگی کا مزید اہم حصہ بنانا ہے۔نئے ہوم پوڈ منی 2 میں پہلی مرتبہ ایپل کے اسمارٹ اسپیکرز کے لیے سری کے نئے اور جدید ورژن کی معاونت فراہم کی گئی ہے۔ اس کے علاوہ اسپیکر میں ’ساؤنڈ گلو‘ نامی ایک نیا فیچر بھی شامل کیا گیا ہے۔ایپل نے نئے ہوم پوڈ منی کے ساتھ ’ہوم ویو‘ نامی اپنا پہلا اسمارٹ ڈسپلے بھی متعارف کرانے کا اعلان کیا ہے، جب کہ ایپل ٹی وی کا اپ ڈیٹ شدہ ورژن بھی پیش کیا گیا ہے، جو سری کے ساتھ بہتر انداز میں کام کرنے کی صلاحیت رکھتا ہے۔ان نئی مصنوعات کو ایپل کی جانب سے اسمارٹ ہوم ٹیکنالوجی کے شعبے میں اپنی موجودگی بڑھانے اور ورچوئل اسسٹنٹ سری کو مزید مؤثر بنانے کی کوششوں کا حصہ قرار دیا جا رہا ہے۔نئے ہوم پوڈ منی 2 کی اہم ترین خصوصیت ’سری اے آئی‘ کی معاونت ہے۔ اس مقصد کے لیے اسپیکر میں ایک نئی چِپ شامل کی گئی ہے، جس کی مدد سے سری محض سوالات کے جواب دینے تک محدود نہیں رہے گی بلکہ صارفین کی جانب سے مختلف کام بھی انجام دے سکے گی۔