کوئٹہ کی ماہ نور بلال نے بیجنگ میں ماڈل شنگھائی تعاون تنظیم کی مشق میں پاکستان کی نمائندگی کر کے ملک کا نام روشن کر دیا
بیجنگ ( آصف اقبال ) بلوچستان کے دارالحکومت کوئٹہ سے تعلق رکھنے والی پاکستان ایمبیسی کالج بیجنگ کی طالبہ ماہ نور بلال نے چین کے دارالحکومت بیجنگ میں شنگھائی تعاون تنظیم (SCO) سیکریٹریٹ میں منعقدہ ماڈل شنگھائی تعاون تنظیم کی مشق میں پاکستان کی مؤثر نمائندگی کی۔ ماہ نور بلال نے اس اہم سفارتی سرگرمی میں ریجنل اینٹی ٹیررسٹ اسٹرکچر (RATS) کی ڈائریکٹر کی حیثیت سے ذمہ داریاں ادا کیں۔اس بین الاقوامی تقریب میں مختلف ممالک کے طلبہ اور مندوبین نے شرکت کی، جہاں علاقائی سلامتی، انسدادِ دہشت گردی میں باہمی تعاون اور بین الاقوامی تعلقات سمیت اہم امور پر تبادلہ خیال کیا گیا۔ شرکاء نے کثیرالجہتی سفارتی تنظیموں کے طریقہ کار کو عملی طور پر سمجھنے اور مختلف ممالک کے درمیان تعاون کو فروغ دینے کی مشق بھی کی کوئٹہ کی ماہ نور بلال کی اس اہم بین الاقوامی سرگرمی میں شرکت پاکستانی نوجوانوں کی صلاحیتوں، سفارتی شعور اور عالمی سطح پر ملک کی نمائندگی کے جذبے کی عکاس ہے ان کی کامیابی بلوچستان سمیت پاکستان بھر کے نوجوانوں کے لیے باعثِ فخر اور حوصلہ افزائی ہے۔
