میکسیکو: کتے کو پولیس میں نوکری مل گئی

میکسیکو کی نیشنل گارڈ نے ایک ایسے نئے اہلکار کو اپنی ٹیم میں شامل کیا ہے جو نہ صرف سب سے چھوٹا رکن ہے بلکہ چار ٹانگوں والا بھی ہے۔13 ماہ کے کمانڈو نامی چیہواہوا کتے کو عوام اور سیکیورٹی اہلکاروں کے درمیان دوستانہ رابطہ بڑھانے کے ساتھ ساتھ سرچ اینڈ ریسکیو آپریشنز کیلئے بھی تربیت دی جا رہی ہے۔صرف 21 سینٹی میٹر قد اور تقریباً 7 کلو وزن رکھنے والے کمانڈو کو چھ ماہ قبل ریاست چیہواہوا میں ایک ریسکیو سینٹر سے گود لیا گیا تھا۔ اس سے قبل وہ ایک معمر جوڑے کے پاس رہتا تھا، جو مزید اس کی دیکھ بھال نہیں کر سکتے تھے۔کمانڈو کتے کو خصوصی حفاظتی چشمے، اس کے سائز کے مطابق ٹیکٹیکل جیکٹ اور سر پر ایک چھوٹا کیمرا پہنایا جاتا ہے۔میکسیکو سٹی میں تربیتی سیشن کے دوران کمانڈو نے سیڑھیاں چڑھیں اور مختلف رکاوٹیں عبور کیں۔