میئر نیویارک نے ہائی سکول کے طلبہ اور پہلی بار سول سروس کا امتحان دینے والوں کیلئے فیس ختم کردی
نیویارک کےمیئر ظہران کوامے ممدانی اور نیویارک سٹی ڈیپارٹمنٹ آف سٹی وائیڈ ایڈمنسٹریٹو سروسز کی کمشنر یومے کیتاسی نے اعلان کیا ہے کہ اب نیویارک سٹی کے ہائی سکول کے طلبہ اور پہلی مرتبہ سول سروس کا امتحان دینے والے امیدواروں سے امتحانی فیس وصول نہیں کی جائے گی۔ہر سال DCAS اوسطاً 175 سول سروس امتحانات منعقد کرتا ہے جن میں ایک لاکھ دس ہزار سے زائد امیدوار حصہ لیتے ہیں۔ یہ امتحانات مختلف سرکاری ملازمتوں کے لیے ہوتے ہیں، جن میں سائنس دان، جنگلات کے ماہر، پل آپریٹر، کیس ورکر، لوہار (بلیک اسمتھ) اور فزیکل تھراپسٹ سمیت کئی دیگر شعبے شامل ہیں۔نیویارک سٹی کی تقریباً 80 فیصد سرکاری ملازمتوں کے لیے سول سروس کا امتحان پاس کرنا لازمی ہوتا ہے۔ نئی فیس معافی کی پالیسی کے تحت لاکھوں نیویارک کے شہریوں، خصوصاً نوجوانوں، کے لیے سرکاری ملازمتوں تک رسائی مزید آسان ہو جائے گی۔میئر ظہران کوامے ممدانی نے کہا:نیویارک شہر کی خدمت کرنا زندگی کا ایک بڑا اعزاز ہے۔ ایسا شہر بنانے کے لیے، جو ہر شہری کے لیے بہتر ہو، ہمارے اسکولوں کے طلبہ، ہماری گلیوں میں چلنے والے لوگ اور وہ تمام نیویارکرز سب سے زیادہ موزوں ہیں جو اس شہر کو اپنا گھر سمجھتے ہیں۔ ہائی اسکول کے طلبہ اور پہلی بار امتحان دینے والوں کے لیے سول سروس کے امتحانات مفت کر کے ہم لاکھوں مزید شہریوں کے لیے اپنے پسندیدہ شہر کی خدمت کے دروازے کھول رہے ہیں۔کمشنر یومے کیتاسی نے کہا:ہم چاہتے ہیں کہ ہر نیویارکر کو عوامی خدمت کے شعبے میں بہترین کیریئر کے مواقع میسر ہوں۔ نئی فیس معافی اور امتحانات سے متعلق معلومات مختلف زبانوں میں فراہم کر کے ہم مزید لوگوں کے لیے نیویارک سٹی میں ملازمت حاصل کرنا آسان بنا رہے ہیں۔ ہمارا مقصد ایسی تمام رکاوٹیں ختم کرنا ہے جو اہل امیدواروں کو سرکاری ملازمت حاصل کرنے سے روک سکتی ہیں، تاکہ ہماری افرادی قوت مزید مضبوط ہو۔
