مائیکل جیکسن کی مشہور ’تھرلر‘ جیکٹ کی نیلامی، قیمت کیا ہوگی؟

پاپ موسیقی کے بے تاج بادشاہ مائیکل جیکسن کی مشہور سرخ اور سیاہ ’تھرلر‘ جیکٹ ایک مرتبہ پھر نیلامی کے لیے پیش کی جا رہی ہے۔اس بار یہ نیلامی دسمبر میں ابوظبی میں ہوگی، جہاں گلوکار کے ملبوسات اور دیگر یادگار اشیا کے 100 سے زائد نمونے خریداروں کے سامنے رکھے جائیں گے۔ ان میں جیکٹ کے علاوہ ان کا مشہور چمک دار دستانہ اور 1983 میں استعمال ہونے والے جوتوں کے دو جوڑے بھی شامل ہیں۔جولینز آکشنز کے زیرِاہتمام ’مائیکل جیکسن: دی فیشن لیگیسی ایوننگ آکشن‘ 7 سے 9 دسمبر 2026 تک روزوُڈ ابوظبی میں منعقد ہوگی۔ اس نیلامی کو کمپنی کے ’سیلیبریٹی اینڈ پاپ کلچر ایکسپیرینس‘ کا حصہ بنایا گیا ہے۔’تھرلر‘ میوزک ویڈیو کے لیے ایسی صرف دو جیکٹیں تیار کی گئی تھیں۔ ان کا ڈیزائن ملبوسات کی معروف ڈیزائنر ڈیبورا نڈولمین لینڈس نے تیار کیا تھا، جو ویڈیو کے ہدایت کار جان لینڈس کی اہلیہ ہیں۔ ان میں سے ایک جیکٹ زومبی رقص کے دوران استعمال ہونے سے گھس گئی تھی اور جیکسن خاندان کے پاس محفوظ رہی، جبکہ دوسری ابوظبی میں نیلامی کے لیے پیش کی جا رہی ہے۔