آئی سی سی نے نئی ٹیسٹ رینکنگ جاری کر دی جس میں انگلینڈ کے تجربہ کار بلے باز جو روٹ دوبارہ پہلی پوزیشن حاصل کرنے میں کامیاب ہوگئے۔بلے بازوں کی تازہ ترین رینکنگ کے مطابق جو روٹ نے پہلی پوزیشن اپنے ہم وطن کھلاڑی ہیری بروک سے چھینی ہے، جو ایک ہفتہ قبل اپنی کارکردگی کے باعث پہلے نمبر پر آگئے تھے۔ہیری بروک پہلی پوزیشن چھن جانے کے بعد فہرست میں تیسری نمبر پر چلے گئے جبکہ نیوزی لینڈ کے بلے باز کین ولیمسن دوسرے نمبر پر آگئے۔جو روٹ نے بھارت کے خلاف تیسرے ٹیسٹ کی پہلی اننگز میں 104 رنز اور دوسری اننگز میں 40 رنز کی اننگز کھیلی تھی جس کی بدولت انگلینڈ نے مہمان ٹیم کو 22 رنز سے شکست دی تھی۔دوسری جانب، بھارتی ٹیم کے کپتان شبمن گل لارڈ ٹیسٹ میں اچھی کارکردگی دکھانے میں ناکام رہے، جس کے سبب وہ چھٹے سے 9ویں نمبر پر چلے گئے جبکہ انکے ہم وطن کھلاڑی ریشابھ پنت تنزلی کے بعد 8ویں نمبر پر پہنچ گئے۔آسٹریلیا کے اسٹیو اسمتھ چوتھی پوزیشن حاصل کرنے میں کامیاب ہوگئے جبکہ بھارتی اوپنر جیسوال تنزلی کے بعد پانچویں نمبر پر چلے گئے۔ بھارت کے رویندرا جدیجا اور کے ایل راہول کی ریکنگ میں بہتری آئی ہے۔بولنگ کے شعبے میں بھارت کے جسپریت بمراہ پہلی پوزیشن پر براجمان ہیں جبکہ ویسٹ انڈیز کے خلاف ٹیسٹ میں ہیٹ ٹرک کرنے والے آسٹریلوی بولر اسکوٹ بولینڈ چھٹے نمبر پر آگئے۔ویسٹ انڈیز کے خلاف بہترین بولنگ کی بدولت آسٹریلیا کے فاسٹ بولر مچل اسٹارک رینکنگ میں 10واں نمبر برقرار رکھ پائے ہیں۔
