ڈھاکہ: بنگلہ دیش کی سابق وزیر اعظم خالدہ ضیا اسپتال میں زیر علاج ہیں اور ان کی حالت انتہائی تشویشناک ہے۔العربیہ پر شائع اے ایف پی کی رپورٹ کے مطابق خالدہ ضیا کی طبیعت خرابی کے باعث ان کے اہل خانہ اور پارٹی کے ارکان نے عوام سے ان کی جلد صحت یابی کیلیے دعاؤں کی اپیل کی۔80 سالہ خالدہ ضیا کو 23 نومبر کو پھیپھڑوں میں انفیکشن کی علامت ظاہر ہونے پر اسپتال منتقل کیا گیا تھا جہاں وہ آئی سی یو میں زیر علاج ہیں۔سابق بنگلہ دیشی وزیر اعظم کی جماعت بی این پی کے رکن مرزا فخر العالمگیر نے صحافیوں کو بتایا کہ ڈاکٹروں نے ہمیں بتایا ہے کہ ان کی حالت انتہائی تشویشناک ہے۔بنگلہ دیشی انگریزی اخبار دی ڈیلی اسٹار کی رپورٹ کے مطابق خالدہ ضیا کو دل کے مسائل، جگر اور گردے کی بیماریوں، ذیابیطس، پھیپھڑوں کی بیماری، جوڑوں کا درد اور آنکھوں سے متعلق بیماریاں لاحق ہیں۔خالدہ ضیا کے بڑے بیٹے طارق رحمان 2008 سے لندن میں مقیم ہیں۔ انہوں نے نے سوشل میڈیا پر اپنی والدہ کی صحت یابی کیلیے بنگلہ دیشی عوام سے دعاؤں کی درخواست کی۔واضح ہے کہ وہ تین مرتبہ بنگلہ دیش کی وزیر اعظم رہ چکی ہیں۔ انہیں 2018 میں شیخ حسینہ کی حکومت نے کرپشن کے الزامات میں قید کیا تھا اور انہیں علاج کیلیے بیرون ملک جانے کی اجازت نہیں دی گئی تھی۔
