مسلم فٹبالر کی فرانس کی نمائندگی سے انکار کی خبروں کی تردید

283

مانچسٹر یونائیٹڈ کے عالمی شہرت یافتہ مسلم فٹبالر پال پوگبا نے فرانسیسی صدر ایمانویل میکرون کی جانب سے اسلام مخالف بیان پر فرانس کی نمائندگی سے انکار کی خبروں کی تردید کردی۔

پال پوگبا نے انسٹاگرام پر اپنی پوسٹ میں خبر کو بے بنیاد قرار دیتے ہوئےکہا ہےکہ نہ تو میں نے ایسا کہا ہے اور نہ ہی ایسا سوچا ہے۔

فٹبالر کا کہنا ہے کہ وہ اس بات پر سخت ناراض اور مایوس ہیں کہ کچھ میڈیا ادارے بے بنیاد سرخیوں کے لیے مجھے استعمال کرکے ایک انتہائی حساس موضوع میں فرانسیسی ٹیم کو گھسیٹ رہے ہیں۔

پوگبا کاکہنا ہے کہ وہ ہر قسم کے تشدد اور دہشت گردی کے خلاف ہیں، میڈیا کے کچھ نمائندے خبر بناتے وقت غیر ذمہ داری کا مظاہرہ کرتے ہوئے خبر کی تصدیق نہیں کرتے اور صحافتی آزادی کا غلط استعمال کرتے ہیں اور یہ بھی نہیں سوچتے کہ اس کا کسی کی زندگی پر کیا اثر ہوگا۔

فرانسیسی مسلم فٹبالر نے غلط خبر شائع کرنے اور اسے پھیلانے والوں کے خلاف قانونی کارروائی کا بھی اعلان کیا ہے۔