عمان نے 8 سال بعد شام میں اپنا سفیر دوبارہ مقرر کردیا
مسقط : امریکا اور دیگر خلیجی ریاستوں کے غیر معمولی دباؤ کے باوجود عمان نے 8 سال بعد شام میں اپنا سفیر تعینات کردیا،جس کے بعد عمان شام میں اپنا سفیر بحال کرنے والی پہلی خلیجی ریاست بن گئی ہے۔
غیر ملکی خبر رساں ادارے کے مطابق عمان نے شام میں اپنا سفیر دوبارہ مقرر کرنے کا اعلان کردیا ہے۔ سال2012ء میں دمشق میں قائم خلیجی سفارتی مشن کے دفاتر پر حکومتی حملوں کے بعد تمام خلیجی ممالک نے اپنے سفارتی مشن احتجاجاً بند کر دیے تھے۔
واضح رہے کہ عمان ان چند خلیجی عرب ریاستوں میں سے ایک ہے جس نے 2011 ء کی بغاوت کے بعد اور امریکا اور دیگر خلیجی ریاستوں کے غیر معمولی دباؤ کے باوجود صدر بشارالاسد کی حکومت کے ساتھ تعلقات قائم کر رکھے ہیں۔
اتوار کو شامی وزیر خارجہ نے عمان کے سفیر ترک بن محمود البوسعیدی کی اسناد قبول کرتے ہوئے انہیں آئندہ مارچ سے شاہی فرمان کے ساتھ عمان کے سفیر کے طور پر دمشق میں ان کی تعیناتی کو تسلیم کرنے کا اعلان کیا۔