بھارتی فوج کی ریاستی دہشت گردی میں 2 کشمیری نوجوان شہید

سری نگر: مقبوضہ کشمیر میں بھارتی فوج کی جارحیت میں 2 کشمیری نوجوان شہید ہوگئے۔

کشمیر میڈیا سروس  کے مطابق جنت نظیر وادی کے ضلع راجوڑی میں سرچ آپریشن کے دوران قابض بھارتی فوج نے فائرنگ کرکے دو کشمیری نوجوانوں کو شہید کردیا جب کہ بھارتی فوج کی فائرنگ سے ایک نوجوان زخمی بھی ہوا۔

بھارت نواز کٹھ پتلی انتظامیہ نے نوجوانوں کی شہادت کے واقعے کو مقابلہ ظاہر کرنے کی کوشش کرتے ہوئے بتایا کہ نوجوان عسکریت پسند اور مسلح تھے تاہم اہل علاقہ نے بھارتی فوج کا جھوٹ بے نقاب کردیا۔ بھارتی فوج نے لاشوں کو لواحقین کے حوالے کرنے سے بھی انکار کردیا۔

واضح رہے کہ گزشتہ ماہ بھی بھارتی فوج کی جارحیت میں 54 کشمیری نوجوانوں نے جام شہادت نوش کیا تھا جب کہ اس ماہ بھی بھارتی فوج کے جبر کا سلسلہ جاری ہے اور مختلف واقعات میں درجنوں کشمیری نوجوانوں کو شہید کیا جا چکا ہے۔