بھارت میں کورونا قابو سے باہر، ایک دن میں ریکارڈ 22 ہزار کیسز رپورٹ

بھارت میں کورونا وائرس قابو سے باہر ہونے لگا جہاں ایک ہی روز میں 22 ہزار نئے کیسز سامنے آئے ہیں۔

بھارتی میڈیا کے مطابق کورونا وائرس کے دوران یہ اب تک دوسری مرتبہ ایک ہی دن میں سب سے زیادہ کیسز کی تعداد ہے اور ملک میں یکم جون سے اب تک کورونا کے 4 لاکھ سے زائد کیسز رپورٹ ہوچکے ہیں۔

بھارتی میڈیا کا بتانا ہےکہ گزشتہ 24 گھنٹوں کے دوران 22 ہزار 771 نئے کیسز سامنے آنے سے ملک میں کیسز کی کل تعداد 6 لاکھ 48 ہزار سے تجاوز کرگئی ہے جب کہ گزشتہ 24 گھنٹوں میں ہی 442 افراد ہلاک بھی ہوچکے ہیں۔

بھارتی وزیر صحت کے مطابق ملک میں کورونا سے ہلاک ہونے والوں کی تعداد 18600 سے بھی تجاوز کرگئی ہے جب کہ اب تک 3 لاکھ 94 ہزار سے زائد مریض صحتیاب بھی ہوچکے ہیں۔