کمال آر خان پریانکا چوپڑا اور نک جونس کی طلاق کی پیشگوئی کرنے پر تنقید کی زد میں
ممبئی: بالی ووڈ اداکار اور فلمی تجزیہ نگار کمال آر خان عرف کے آر کے کو اداکارہ پریانکا چوپڑا اور نک جونس کی طلاق کی پیشگوئی کرنا مہنگا پڑگیا۔
خود کو بالی ووڈ فلموں کا تنقید نگار کہنے والے کمال آر خان سلمان خان کے ساتھ ہوئے تنازع کی وجہ سے گزشتہ کچھ عرصے سے بھارتی میڈیا کی شہ سرخیوں پر چھائے ہوئے ہیں۔ حال ہی میں وہ ایک بار پھر اپنی پیشگوئی کی وجہ سے خبروں میں ہیں۔
کے آر کے کی یہ ٹوئٹ وائرل ہوگئی جس کے بعد سوشل میڈیا صارفین کی جانب سے انہیں شدید تنقید کا نشانہ بنایا جارہا ہے۔ لوگوں کا کہنا ہے کہ کے آر کے اب کچھ زیادہ ہی بول رہے ہیں انہیں لوگوں کی ذاتی زندگی کے متعلق تبصرے نہیں کرنے چاہئیں۔
ایک اور ٹوئٹر صارف نے لکھا آپ اداکار بن نہیں پائے، تنقید نگار بننے کی کوشش کرتے کرتے اب نجومی بننا چاہتے ہیں جو کہ ناممکن ہے۔ جیوتی نامی خاتون نے کہا آپ پریانکا چوپڑا اور نک جونس کی ذاتی زندگی کے بارے میں بات کرکے حد پار کررہے ہیں۔
واضح رہے کہ سلمان خان کی فلم ’’رادھے‘‘ کی ریلیز کے بعد کے آر کے نے نہ صرف ان کی فلم کا جائزہ لیا تھا بلکہ سلمان خان کی ذات کو بھی تنقید کا نشانہ بنایا تھا جس کے بعد سلو میاں نے کے آر کے کے خلاف ہتک عزت کا مقدمہ درج کروادیا تھا۔