جب ملک میں سینیما ہی نہیں تو فلم سٹارز کہاں سے آئیں گے، عتیقہ اوڈھو

223

پاکستان کی معروف اداکارہ عتیقہ اوڈھو نے کہا کہ ہمارے ملک میں سینیما ہی نہیں ہیں تو فلم اسٹارز کہاں سے بنیں گے۔

پاکستان انٹرنیشنل فلم فیسٹیول ویمنز ایڈیشن میں گفتگو کرتے ہوئے انہوں نے کہا کہ پاکستان میں ٹی وی ڈرامہ بہت مقبول ہے اسی وجہ سے یہاں ڈرامہ اسٹارز بہت مشہور ہو جاتے ہیں۔

انہوں نے کہا کہ جیسے جیسے ہمارے ملک میں فلمیں بنیں گی تب نئے اداکار بھی سامنے آنے لگ جائیں گے۔

ان کا کہنا تھا کہ عالمی وبا کورونا وائرس کی وجہ سے دیگر صنعتوں کی طرح فلمی صنعت بھی بری طرح متاثر ہوئی ہے۔

عتیقہ اوڈھو نے کہا کہ ہمارے سینما مالکان برباد ہوچکے ہیں، حکومت کو چاہئے کہ صرف ٹیکس معافی پر اکتفا نہ کرے بلکہ سینما سے وابستہ افراد کی مالی معاونت بھی کرے۔

انہوں نے کہا کہ سیاحت کے شعبے کو فروغ دینے کے لیے جس طرح کے غیر معیاری اشتہارات بن رہے ہیں حکومت کو چاہئے کہ ان اشتہارات پر خرچ ہونے والا پیسہ فلم کے لوگوں کو دیں تاکہ وہ اپنی فلموں کے ذریعے ملک کی خوبصورتی کو اجاگر کر سکیں۔