اسپتال میں آکسیجن سلنڈرز کا انتظام کرنے پرسشمیتا تنقید کی زد میں

On اپریل 23, 2021

سابق مس ورلڈ اور اداکارہ سشمیتا سین ممبئی کے بجائے دہلی میں کورونا کے مریضوں کے لیے آکسیجن سلنڈرز کا انتظام کرنے پر سوشل میڈیا صارفین کے ہاتھوں تنقید کا نشانہ بن گئیں۔

بھارتی میڈیا کے مطابق بھارت کے دارالحکومت نئی دہلی کے شانتی مکند اسپتال کے سی ای او سنیل ساگر میڈیا کو کورونا کی صورتحال اور اسپتال میں آکسیجن سلنڈرز کی کمی کے بارے میں بتاتے ہوئے جذبات پرقابو نہ رکھ سکے اور روپڑے۔

بھارتی اداکارہ سشمیتا سین نے یہ ویڈیو ٹوئٹر پر شیئر کرتے ہوئے لکھا یہ بہت افسوسناک ہے۔ آکسیجن کی کمی کا بحران ہر جگہ موجود ہے۔ سشمیتا نے لکھا میں نے دہلی کے اس اسپتال کے لیے چند آکسیجن سلنڈرز کا انتظام کرلیا ہے لیکن مشکل یہ ہے کہ ان آکسیجن سلنڈرز کو ممبئی سے دہلی بھیجنے کے لیے کوئی راستہ نہیں ہے۔ اداکارہ نے تمام لوگوں سے درخواست کرتے ہوئے کہا کہ یہ سلنڈرز دہلی پہنچانے میں ان کی مدد کریں۔

ٹوئٹر پر جہاں لوگوں نے سشمیتا کے اس اقدام کو سراہا وہیں کچھ لوگوں نے ان پر تنقید کی کہ اگر آکسیجن کی کمی کا بحران ہر جگہ موجود ہے تو آپ ان سلنڈرز کو دہلی کیوں بھیج رہی ہیں۔ دہلی بھیجنے کے بجائے آپ ان سلنڈرز کو ممبئی میں کسی نزدیکی اسپتال میں بھی بھیج سکتی ہیں۔

سشمیتا سین نے اس شخص کو جواب دیتے ہوئے کہا ممبئی میں ابھی بھی آکسیجن سلنڈرز موجود ہیں اور اسی وجہ سے میں ان سلنڈرز کا انتظام کرنے میں کامیاب ہوئی ہوں۔ لیکن دہلی میں آکسیجن سلنڈرز کی کمی ہے اور وہاں ان کی زیادہ ضرورت ہے۔ خاص کر چھوٹے اسپتالوں میں لہذا اگر آپ بھی مدد کرسکتے ہیں تو کریں۔