کورونا وائرس کا پھیلاؤ کم نہ ہوا تو اولمپکس گیمز دوبارہ ملتوی کر دیں گے: جاپانی حکومت

307

کھیلوں کے شائقین کیلئے بری خبر ہے کہ جاپانی حکومت نے اعلان کیا ہے کہ اگر عالمی وبا کورونا وائرس کے پھیلاؤ میں کمی نہ آئی تو فوری طور پر اولمپکس گیمز ملتوی کر دی جائیں گی۔

میڈیا رپورٹس کے مطابق یہ بات حکومتی نمائندہ اور توشی ہیرو نکئی نے ایک ٹیلی وژن کو انٹرویو کے دوران کہی۔ ان کا کہنا تھا کہ ہم ملک میں کورونا وائرس کی صورتحال کا بغور جائزہ لے رہے ہیں۔ ہمیں امید ہے کہ اس عالمی وبا پر قابو پا لیا جائے گا۔

تاہم توشی ہیرو نکئی نے دو ٹوک موقف اختیار کرتے ہوئے کہا کہ اگر کورونا وائرس کا پھیلاؤ اور اس کے خطرناک وار کا سلسلہ جاری رہا تو بغیر کچھ سوچے ہم پہلے سے التوا کا شکار اولمپکس گیمز کو ملتوی کرنے کا فیصلہ کریں گے۔

خیال رہے کہ کھیلوں کے سب سے بڑے مقابلوں اوکمپکس کا انعقاد ٹوکیو میں ہونا ہے۔ تاہم کورونا وائرس کی عالمی وبا کے خطرات کے پیش نظر اسے ملتوی کر دیا گیا تھا۔

جاپانی وزارت کھیل کا پلان ہے کہ اسے رواں سال منعقد کروایا جائے لیکن اسے کورونا وائرس کی صورتحال سے مشروط کر دیا گیا ہے کیونکہ عالمی وبا کی تیسری لہر کی وجہ سے دنیا بھر میں اس کے پھیلنے کے خطرات جنم لے چکے ہیں۔