چینی کمپنی کا 20 لاکھ کلومیٹر تک چلنے والی کار بیٹری بنانے کا اعلان

بیجنگ: الیکٹرک گاڑیوں کی بیٹریاں بنانے والی چینی کمپنی کا کہنا ہے کہ ایسی بیٹریاں بنانے کے لیے تیار ہیں جو گاڑی کو 20 لاکھ کلو میٹر تک چلنے کی صلاحیت فراہم کرے گی اور بیٹری کی کارآمد مدت کا دورانیہ 16 برس تک ہو گا۔

اس وقت زیادہ تر کاریں بنانے والی کمپنیاں کار بیٹری پر 60 ہزار سے ڈیڑھ لاکھ میل تک کی وارنٹی دیتے ہیں، جس کا عرصہ 3 سے 8 برس تک ہوتا ہے۔

چینی کمپنی ’کنٹیمپریری ایمپیکس ٹیکنالوجی‘ (کاٹل) نے ابھی یہ نہیں بتایا کہ وہ یہ ٹیکنالوجی کس کار ساز کمپنی کو فراہم کرے گی۔ پہلے یہ خبر سامنے آئی تھی کہ چینی کمپنی امریکی کمپنی ٹیسلا کے ساتھ مل کر یہ مصنوعات تیار کرے گی۔

اس حوالے سے چینی کمپنی کاٹل کے چیئرمین زینگ یوقن نے خبر رساں ادارے بلومبرگ کو انٹرویو کے دوران بتایا کہ اگر کسی کار ساز کمپنی نے آرڈر دیا تو ہم یہ مصنوعات بنانے کے لیے تیار ہیں۔

ان کے مطابق وہ پہلے سپلائی کی جانے والی بیٹریوں پر دس فیصد پریمیم بڑھانے سے متعلق تیار تھے۔ اس کمپنی نے فروری میں امریکی ٹیک کمپنی ٹیسلا کی ماڈل تھری کاروں کے لیے دو سال کا معاہدہ کیا ہے۔ اس کمپنی کے دیگر گاہکوں میں بی ایم ڈبلیو، ڈیملر، ہنڈا، ٹیوٹا، وولکس ویگن اور وولو شامل ہیں۔ تاہم الیکٹرک کاروں کی مانگ میں اضافہ ہو رہا ہے۔