پاکستان فٹبال کو 5 سال کیلئے معطل کئے جانے کا خدشہ

250

لاہور: پاکستان فٹ بال کو 5 سال کیلئے معطل کئے جانے کا خدشہ ہے جس کے باعث موجودہ صورتحال پر کھلاڑیوں، کوچز اور آفیشلز میں تشویش کی لہر دوڑ گئی ہے۔اتفاق گروپ نے ہفتے کے روز لاہور میں پی ایف ایف کے ہیڈ کوارٹرز سے فیفا کی نامزد نارملائزیشن کمیٹی کو بے دخل کرتے ہوئے کنٹرول سنبھال لیا تھا، اس کارروائی پر سخت تشویش کا اظہار کرتے ہوئے فیفا نے وارننگ جاری کی تھی کہ مداخلت ختم کرکے آج رات تک چارج نارملائزیشن کمیٹی کے حوالے نہ کیا گیا تو پاکستان کی معطلی جیسا سخت ترین قدم بھی اٹھایا جا سکتا ہے۔ذرائع کے مطابق موجودہ صورتحال میں پاکستان کی رکنیت 5 سال کے لیے ختم کی جا سکتی ہے، اس صورتحال میں پاکستانی فٹبالرز، کوچز اور آفیشلز میں تشویش کی لہر پائی جاتی ہے،ان کا کہنا ہے کہ اگر پابندی لگ گئی تو پاکستان فٹبال ماضی کی یاد بن کر رہ جائے گا،فیفا سے مطالبہ ہے کہ پاکستان کے بجائے معاملات میں مداخلت کرنے والوں پر تاحیات پابندی لگائی جائے۔