بنگلادیش میں مودی مخالف مظاہرے کے تیسرے روز پولیس فائرنگ سے 2 افراد ہلاک

ڈھاکا: بنگلادیش میں بھارتی وزیراعظم نریندر مودی کی آمد پر شروع ہونے والے مظاہرے کے تیسرے روز بھی پولیس فائرنگ سے مزید 2 افراد ہلاک اور متعدد زخمی ہوگئے۔

عالمی خبر رساں ادارے کے مطابق بنگلادیش کی آزادی کی 50 ویں سالگرہ کی مناسبت سے منعقد کردہ تقریب میں شرکت کے لیے بھارتی وزیراعظم کی ڈھاکا آمد پر شروع ہونے والے مظاہروں کے تیسرے روز بھی پولیس فائرنگ سے 2 افراد ہلاک اور متعدد زخمی ہوگئے۔

جمعے کے روز سے شروع ہونے والے احتجاج میں پولیس اور مظاہرین کے درمیان جھڑپ میں ہلاک ہونے والوں کی تعداد 13 ہوگئی۔ پہلے روز 5، دوسرے روز 6 اور تیسرے روز 2 مظاہرین ہلاک ہوئے۔

مظاہروں کو کچلنے کے لیے وزیراعظم شیخ حسینہ واجد کے حکم پر دارالحکومت ڈھاکا کے ساتھ تین بڑے شہروں میں پیرا ملٹری فورس کو تعینات کردیا گیا ہے۔ مظاہرے حفاظت اسلام کی جانب سے کیئے جا رہے ہیں۔