آرمینیا میں کورونا وائرس پابندیوں کی خلاف ورزی پر آرمی چیف معطل
یریوان: آرمینیا کے وزیراعظم نیکول پشی نیان نے کورونا وبا کے تناظر میں عائد پابندیوں کی خلاف ورزی کرنے پر ملک کے آرمی چیف، پولیس چیف اور نیشنل سیکیورٹی کونسل کے سربراہ کو معطل کردیا۔
سماجی رابطے کی ویب سائٹ فیس پر اپنے ایک مراسلے میں آرمینیا کے وزیراعظم نیکول پشی نیان نے کورونا وبا سے نمٹنے کے لیے عائد کی گئی پابندیوں کی خلاف ورزی پر آرمی چیف آرٹیک ڈیوٹیان، پولیس چیف آرمن سارگ سیئن اور نیشنل سیکیورٹی کے سربراہ ایڈورڈ مارٹیرو سیئن کی معطلی کا اعلان کیا۔
وزیراعظم نیکول پشی نیان نے اپنے بیان میں آرمی چیف کی معطلی کی واضح وجہ نہیں بتائی تاہم معطلی کے بعد ایک اہم اجلاس سے خطاب کرتے ہوئے وزیراعظم نے ملک کی اہم اور ذمہ دار شخصیات کی جانب سے کورونا وائرس ایمرجنسی کے تحت عائد پابندیوں کی خلاف ورزی پر شدید تنقید کی۔
آرمی چیف آرٹیک ڈیوٹیان نے مقامی میڈیا سے بات کرتے ہوئے بتایا کہ بیٹے کی شادی کی سادہ تقریب گھر ہی میں رکھی گئی تھی جس میں دیگر عہدیدار بھی شریک تھے تاہم تقریب میں کسی پابندی کی خلاف ورزی نہیں کی گئی۔ گھر میں رکھی گئی تقریب نجی معاملہ ہوتا ہے۔
واضح رہے کہ آرمینیا میں 13 ہزار 325 کورونا کے مریض ہیں جب کہ 211 اموات ہوچکی ہیں جس کے بعد ملک بھر میں ایک ماہ کے لیے سخت لاک ڈاؤن کردیا گیا ہے۔