چیڈوک بوسمین کو بعد از مرگ ’گولڈن گلوب‘ ایوارڈ سے نواز دیا گیا

270

گزشتہ برس کینسر کے باعث 43 سال کی عمر میں چل بسنے والے ہولی وڈ سیاہ فام ہیرو چیڈوک بوسمین کو بعد از مرگ پہلا گولڈن گلوب ایوارڈ دے دیا گیا۔

’آسکر‘ کے بعد سب سے زیادہ اہمیت کے حامل ’گولڈن گلوب‘ ایوارڈز کی 78 ویں سالانہ تقریب 28 فروری کو آن لائن منعقد کی گئی اور میزبانوں نے امریکا کے دو مختلف شہروں سے میزبانی کے فرائض سر انجام دیے۔

78 ویں گولڈن گلوب ایوارڈز کی تقریب میں بہترین فلم اداکار کا ایوارڈ آنجھانی اداکار چیڈوک بوسمین کو دیا گیا۔

چیڈوک بوسمین نے ’بلیک پینتھر‘ سمیت کئی کامیاب فلموں میں کام کیا تھا تاہم انہیں ان کی زندگی میں گولڈن گلوب ایوارڈ نہیں دیا جاسکا تھا۔

تاہم ان کی موت کے بعد ان کی ریلیز ہونے والی آخری فلم ‘مارینی، بلیک بوٹم’ میں ان کی شاندار پرفارمنس کی وجہ سے انہیں گولڈن گلوب ایوارڈ دیا گیا جو ان کی بیوہ نے وصول کیا۔