برازیل: اموات کی تعداد بڑھنے سے سرکاری ویب سائٹ پر جاری ڈیٹا چھپا دیا گیا

253

برازیل کی حکومت نے اموات کی تعداد میں مسلسل اضافے کے باعث کورونا وائرس سے ہونے والی ہلاکتوں اور کیسز کی تعداد سے متعلق معلومات شیئر کرنا روک دیں۔

 کورونا کے کیسز میں ہوشربا اضافے  کے بعد برازیل کی حکومت نے کووڈ 19 کے کیسز اور اموات کی اعداد و شمار بتانے والی سرکاری ویب سائٹ  ہی بند کر دی۔

رپورٹ کے بعد سرکاری ویب سائٹ بند کرنے پر برازیل کی حکومت کو عوام کی طرف سے شدید تنقید کا سامنا ہوا، عوامی دباؤ میں آکر ویب سائٹ تو بحال کر دی گئی لیکن اس پر کیسز اور اموات کی معلومات فراہم کرنا روک دیا گیا ہے۔

برازیل کی سرکاری ویب سائٹ پر کووڈ 19 کے آخری مرتبہ دیے جانے والے اعداد و شمار کے مطابق کورونا کیسز کی تعداد 6 لاکھ 15 ہزار بتائی گئی جب کہ اموات کی تعداد 34 ہزار بتائی گئی ہے۔

تاہم دنیا بھر میں برازیل کورونا کیسز کی تعداد میں امریکا کے بعد دوسرے نمبر پر ہے جب کہ اموات کے اعتبار سے یہ تیسرا ملک ہے۔

برازیل کی وزرات صحت کی جانب سے کووڈ 19 کا ڈیٹا چھپانے پر ماہرین نے دعویٰ کیا ہے کہ  اس سے قبل بھی کیسز کی جو تعداد بتائی گئی ہے وہ درست نہیں ہے، اصل کیسز کی رپورٹ منظر عام پر نہیں لائی گئی ہے۔

اس متعلق برازیلین صدر بولسنارو نے اپنی ایک ٹوئٹ میں کہا کہ مجموعی اعداد و شمار اس وقت ملک کی عکاسی نہیں کرتے، کیسز کی رپورٹنگ کے لیے اقدامات کو مزید بہتر بنانے کی کوشش کر رہے ہیں۔