عراق میں امریکی فوجی اڈے پر راکٹ حملے

 بغداد: عراقی دارالحکومت بغداد کے قریب امریکی فوجی اڈے پر 4 راکٹ داغے گئے ہیں۔

برطانوی اخبار (دی گارجین) کے مطابق عراق فوج کی جانب سے جاری بیان میں کہا گیا کہ بغداد کے شمال میں واقع شہر بلد میں ایک فوجی اڈے پر 4 راکٹ داغے گئے ہیں جس کے نتیجے میں ایک شخص کے زخمی ہونے کی اطلاعات ہیں۔

رپورٹس کے مطابق اس فوجی اڈے میں امریکی ڈیفنس کمپنی کے اہلکار اور کنٹریکٹر رہائش پذیر ہیں تاہم یہ راکٹ حملے کس کی جانب سے کیے گئے ہیں اس حوالے سے اب تک کوئی معلومات سامنے نہیں آئی ہیں۔

واضح رہے کہ عراق میں مسلح گروپوں اور ملیشیاؤں کی جانب سے امریکی اتحادی افواج سمیت امریکی تنصیبات کو درجنوں بار راکٹ حملوں سے نشانہ بنایا گیا ہے۔