گیلکسی ایس 21 اسمارٹ فون اب کار کی شناخت اور لاک بھی کھول سکتا ہے

سیؤل ، جنوبی کوریا: گیلکسی ایس 21 اسمارٹ فون کی بدولت بہت جلد آپ اپنی کار کو پارکنگ میں تلاش کرسکتےہیں اور اس کی مدد سے گاڑی کو کھولنے اور بند کرنے کا کام بھی کرسکتے ہیں۔

حال ہی میں گیلکسی ایس 21 کے زبردست فیچر سے دنیا حیرت ذدہ تھی کہ اب اس میں مزید نئے خواص بھی سامنے آئے ہیں۔ ان میں سے ایک فیچر ڈجیٹل کی ہے جس سے گاڑی کو کھولا اور بند کیا جاسکتا ہے۔ سام سنگ نے یہ فیچر ایپل کار کی کے جواب میں پیش کیا ہے۔ تاہم کار کے علاوہ گھر، آلات اور دیگر اشیا کے لیے بھی ڈجیٹل کی کو استعمال کیا جاسکتا ہے۔

ڈجیٹل کی میں آپ اپنے دوستوں اور اہلِ خانہ کو بھی شامل کرسکیں گے اور وہ بھی اپنے فون سے عین یہی سہولیات حاصل کرسکیں گے۔ اس کے لیے سام سنگ نے کار کنیکٹویٹی کنسورشیئم اور ایف آئی آر اے کنسورشیئم سے بھی اشتراک کیا ہے۔ تاہم پہلے مرحلے میں سام سنگ ڈجیٹل کی بی ایم ڈبلیو، فورڈ اور جینیسس ماڈلوں پر کام کرے گی۔

واضح ہے کہ یوڈبلیوبی سپورٹ گیلکسی ایس 21 ، گیلکسی ایس 21 الٹرا، گیلکسی ایس 21 پلیس، نوٹ 20 الٹرا اور زیڈ فولڈ ٹو کے لیے ہے۔ تاہم اس کے لیے اینڈروئڈ 11 ، ون یو آئی 3.1 فیچرز ہونے ضروری ہیں۔ اس سال کے وسط تک ڈجیٹل کی پہلے گاڑیوں اور پھر گھروں کے لیے پیش کی جائے گی۔