ٹرین حادثے میں زندگی کھو دینے والی اداکارہ نجمہ محبوب کی برسی
پاکستان میں ٹیلی ویژن اور فلم نگری کی معروف اداکارہ نجمہ محبوب 6 دسمبر 1983ء کو ایک حادثے میں زندگی کی بازی ہار گئی تھیں۔ آج ان کی برسی ہے۔
نجمہ محبوب 1949ء میں راولپنڈی میں پیدا ہوئیں۔ انھوں نے اسٹیج ڈراموں سے اداکاری کے فن میں خود کو آزمانے کا آغاز کیا اور 1969ء میں ان کے ٹیلی ویژن ڈراموں میں کردار نبھانے کا سلسلہ شروع ہوا۔
پی ٹی وی پر نجمہ محبوب کا پہلا ڈراما ‘‘ہاتھی دانت’’ تھا جو لاہور اسٹیشن سے نشر ہوا۔ ان کی متاثر کن اداکاری کے سبب انھیں متعدد ٹی وی ڈراموں میں کام کرنے کا موقع ملا۔ اپنے اس کام یاب سفر کے دوران نجمہ محبوب نے فلم نگری کا رخ کرلیا۔
ایک پنجابی فلم کی شوٹنگ کے دوران نجمہ محبوب چلتن ایکسپریس کی ٹکر سے زندگی کی بازی ہار گئیں۔ اس اداکارہ کی مشہور فلموں میں سلطانہ ڈاکو، ان داتا، ٹھگاں دے ٹھگ، غازی علم الدین شہید اور سالا صاحب شامل ہیں۔